منتدى بنات مسلمات بجد ونفسهم يوصلوا للناس ان التدين نهر السعادة


    مين نفسه ان شاء الله ربنا يبلغه رمضان ؟؟

    شاطر
    avatar
    moon adorer

    المساهمات : 90
    تاريخ التسجيل : 15/08/2009
    العمر : 27

    مين نفسه ان شاء الله ربنا يبلغه رمضان ؟؟

    مُساهمة  moon adorer في الإثنين أغسطس 24, 2009 7:46 am

    مين نفسه ان شاء الله ربنا يبلغه رمضان ؟؟
    اكيد كلنا طبعا
    وانا نفسي اكتر منكو اني اكون السنه دي ان شاء الله من العتقاء
    ((إذا كان أول ليلة من شهر رمضان صفدت الشياطين ومردة الجن
    وغلقت أبواب النار فلم يفتح منها باب،
    وفتحت أبواب الجنة، فلم يغلق منها باب،
    وينادي منادٍ كل ليلة:
    يا باغي الخير أقبل
    ويا باغي الشر أقصر،
    ولله عتقاء من النار،
    وذلك في كل ليلة))
    [أخرجه ابن ماجة وحسنه الألباني].


    بس سألت نفسي ازاي اكون من العتقاء ؟؟
    اعمل ايه زياده عن كل سنه
    وافتكرت رمضان بيعدي عليا ازاي ف كل سنه
    ف الاول الواحد بيبئى فرحان اووووي انه صايم حتى لو كان تعبان
    بس ياترى بقضي يوم الصيام ازاي
    اقولكو انا كنت بعمل ايه ؟؟
    بيني وبينكو كده زي ما بيقولو ..
    مع الحياه رمضان احلى
    واسأل مجرب من رمضان اللي فات .
    ... مسلسلاتك عندنا
    كلنا من قبل رمضان ما ييجي وبنبئى متشوقين للمسلسلات اللي بيعلنو عنها من قبلها بشهر
    والمسابقات والكرتون وبكار وحاجات كتير
    محدش يقدر ينكر ان التليفزيون بيبئى جامد ف رمضان
    وكنا بنتفرج ونقول هنسلي صيامنا
    اصلي حسه ان الوقت بيمر بطئ اوي
    ومش عارفه اعمل ايه وحسه اني همدانه
    بالذات ساعه العصر الواحد بيكون جاب اخره
    مع اني كنت نايمه نص النهار بس عادي بئى احنا صايمين ..
    ساعه العصر دي كنت بقضيها ع النت والفيس والشات
    اهو بيضيع الوقت ويخليه يعدي بسرعه لحد الفطار
    يا رب الاذان يأذن بئى انا هموت م الجوع وريحه الاكل ايه هتجنني

    مكنتش اعرف اني بضيع على نفسي اعظم ثواب ف الدنيا وهو قراءه القرآن الكريم وقت العصر
    وقريت الحديث :

    يتعاقبون فيكم : ملائكة بالليل وملائكة بالنهار ، ويجتمعون في صلاة العصر وصلاة الفجر ، ثم يعرج الذين باتوا فيكم ، فيسألهم ، وهو أعلم بكم ، فيقول : كيف تركتم عبادي ؟ فيقولون : تركناهم وهم يصلون ، وأتيناهم وهم يصلون
    فما بالك لو صليت وقرأت القرآن ولو نصف ساعه ونت مستشعره ف قلبك مش مجرد بعمل اللي عليا واقرا بسرعه عشان الحق اختم قبل صاحبتي الفلانيه او انجز بئى قبل ما التمثيليه تيجي

    (آخر ساعة من النهار _قبل الغروب)
    هذه الساعة الثمينة تفوت على المؤمن الصائم غالباً بالانشغال بإعداد الإفطار والتهيؤ له وهذا لا ينبغي لمن حرص على تحصيل الأجر فهي لحظات ثمينة ودقائق غالية.. هي من أفضل الأوقات للدعاء وسؤال الله تعالى _ فهي من أوقات الاستجابة .
    كما جاء في الحديث: ( ثلاث مستجابات: دعوة الصائم، ودعوة المظلوم، ودعوة المسافر) رواه الترمذي.

    ويا سلام بئى اول م الاذان يأذن خلاص الحمد لله اخيرا هاكل !!! و افضل اكل اكل اكل .. واشرب عصير
    وبعد ما نشيل الاكل يا ماما فين الحلو ؟؟

    وبعد كده احلي بكنافه و ببسبوسه والحاجات الحلوه بتاعه رمضان دي .. واااااه
    واول حاجه كنت بقولها مش قادره اتنفس من كتر الاكل
    والاقي العشاء بتأذن وانا طبعا بروح اصلي التراويح
    بس بلاقي نفسي مش قادره اقف
    عاوزه اصلي وانا قاعده مش قادره بطني هتنفجر

    بصراحه كنت بكسل ساعات عن صلاه التراويح واقول انا لو صليتها هنا ف البيت هيبئى احسن هبئى مركزه اكتر .. هناك بيبئى دوشه ف المسجد
    هنا هبئى براحتي وهصلي برده ان شاء الله بجزء برده زي المسجد بالظبط ويجي الليل الاقي نفسي كسلانه ان شاء الله هقوم
    بس لو صليت متاخر ف الثلث الاخير هيبئى افضل ده ربنا خصص الوقت ده ولحد ما يجي الساعه واحده انا هتفرج ع المسلسل ده ده بتاع نور الشريف او محمد صبحياو غيرهم ودول ناس محترمه يعني مش هاخد ذنوب واحنا ف رمضان وأتفرج عليه واول ما يخلص جه الاعلان عن المسلسل التالي
    الله هو الممثل الفلاني عمل مسلسل بالصعيدي اكيد هيبئى جامد خلاص انا هاخد فكره عنه وبعدين لسه شويه على قيام الليل
    واتفرج عليه واقوم اعملي حاجه اشربها ولا فشار او اي حاجه تسليني ... خلاص وقت الصلاه جه اهو اقوم بئى والحمد لله باعجوبه طفيت التليفزيون ودخلت عشان اصلي واتوضيت ولسه بدور ع الاسدال لقيت اختي فتحت التليفزيون وبتقول ان صاحبتها قالتلها ده فيه تمثيليه جميله اوي شغاله ع التليفزيون .. فطبعا الفضول غلبني وقعدت اشوفها وخلاص دلوقت الساعه قربت على اتنين يا دوب بئى اقوم الحق اصلي ركعتين بسرعه كده اهو احسن من مفيش برده ..
    بس انا عينيا وجعاني اوي وعماله اتاوب خمسين مره ف الدقيقه .. انا والله نيتي كانت اني اصلي بس انا مش قادره واكيد انا خدت ثواب واجر ع النيه دي
    ودخلت اكل حاجه قبل ما انام بئى لاني اكيد مش هقدر اصحى ع السحور
    اااه نفسي انام اوي .. حسه اني هنام لحد العصر
    انا اتفقت مع اصحابي بكره يعدو عليا ونروح النادي كويس ان احنا هنخرج بعد الفطار عشان اعرف احط ميك اب اصل الوحد مبيعرفش يحط وهو صايم عشان ميفطرش
    يا رب افتكر انزل الاغاني ع الموبايل
    !!! منا مش هسمعها غير بعد الفطار لكن وانا صايمه لأ طبعا انتو عاوزيني افطر

    وبكده عدى اليوم الاول من رمضان الحمد لله
    !!!
    وملخصه اني جعت وعطشت وعذبت نفسي
    كنت فاكره اني بعمل كل حاجه صح وانا صايمه بس واول ما المغرب يأذن خلاص اعمل براحتي

    مش قادره اسميه صيام لاني ببساطه مصمتش غير عن الاكل والشرب وفطرت ع التليفزيون والاغاني والمسلسلات واكيد طبعا قعدت اشيت
    ممكن تكون المسلسلات دي محترمه وكويسه وليها هدف
    ممكن اكون انا شيت مع بنات زيي مكلمتش الولاد وكده مش حرام
    بس بذمتكو انا كده ضيعت على نفسي ثواب اد ايه كنت ممكن اخده ف كل دقيقه بتمر عليا
    وضيعته ف سبيل ايه
    تسليه ؟؟؟؟
    كان ممكن اقرأ القرآن حتى لو نص ساعه ساعه العصر وزيها ساعه الفجر
    كان ممكن اروح اصلي التراويح حتى لو مكنتش مركزه اول مره بس هجاهد نفسي واحاول اركز واقف ف الصفوف الاماميه وبكده هاخد اجرين اجر الصلاه واجر مجاهده النفس
    قال تعالى
    ((وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ))
    [العنكبوت: 69].



    ولما اروح تعبانه انام كام ساعه واصحى على الساعه اتنين قبل الفجر واصلى قيام ليل وتهجد حتى لو ركعتين وركعتين .. ده انا حتى لما اقوم اساعد ماما ف البيت واستحضر نيه بر الوالدين هاخد عليها اجر كبير ونومي بالنيه هيكون عليه اجر ..ايوه لما انام واقول يا رب انا هنام عشان اقدر اصحى واطيعك
    زي ما الصحابه كانو بيعملو
    عداد حسنات شغال طول ما انت نايم
    وفي الصحيحين عن الرسول صلى الله عليه وسلم أنه قال:
    ((من قامَ رمضان إيماناً واحتساباً غُفِرَ له ما تقدَّم من ذنبه))
    [متفق عليه].


    بس فيه حاجه محيراني ..
    مش الحديث بيقول ان الشياطين بتصفد في شهر رمضان ؟؟
    امال ازاي انا بعمل الحاجات الغلط الكتير دي
    اه طبعا الشياطين بتصفد وبتغلغل لكن هيا من دلوقت بتلحق تعمل كل حاجه تقدر عليها قبل ما تتحبس مهيآلك الجو من دلوقت ومخلياكي مجهزه خطه التليفزيون والخروجات ولاعزايم وكل حاجه ومتنسوش النفس الاماره بالسوء
    انا مش بقول اننا ما نتعزمش ولا نعزم ولا تفسح
    بس بقول بلاش نخلي كل تفكيرنا ف ده
    ده حتى ف الخروج والعزايم بالنيه نقدر نحولها لطاعات

    فاحتسبي الأجر عند الله عز وجل وأنت بتجهزي الاكل وبتحضريه دايما حطي قدام عينيكي قوله صلى الله عليه وسلم: ((من فطّر صائماً كان له مثل أجره غير أنه لا ينقص من أجر الصائم شيئاً)) [أخرجه أحمد وصححه الألباني]


    ياجماعه بلاش نضيع رمضان السنه دي
    رمضان ضيف بيجيلنا مره واحده بس فالسنه
    شوفو لما ضيف يجيلكو البيت بتكرموه ولا لآ
    بتحسسوه باهميته ولا بتسيبوه وكأنه مش موجود ؟
    اكيد طبعا هتكرموه وتقدمولو كل اللي عندكو وتشتغلو وتظبطو نفسكو والبيت قبل ما ييج وتحضرو لزيارته كل حاجه من قبلها وتبئو مستنينه بلهفه
    فما بالكو ده بئى ضيف من عند الله
    يا ترى هتكرموه ؟؟؟
    ولا هيعدي علينا ولا كانه عدى
    يا رب اكون قدرت اوصلكو احساسي


    بجد رمضان كريم وكل ما بتكرميه هيكرمك ما تضيعوش الكنز ده من ايديكو وجاهدي نفسك وما تستسلميش لهواكي ولمزاجك
    وصوني جوارحك كلها
    صوني عينيكي بأنك ماتتفرجيش على حاجات مش كويسه او كليبات او مواقع ع النت تتكسفي لو حد شافك بتتفرجي عليها
    صونو الاذن وماتسمعوش الاغاني او كلام خارج
    واللسان ومتغتابيش حد او تشتمي حد ...
    حطي حواليكي فلتر ينقيكي من كل حاجه
    حافظو على نقاء قلبكو من اي حاجه (زي ما بقولو كده ) تلحوسه
    وااكثروا من الاستغفار
    والتوبه
    وعلى فكره والله رمضان فرصه لاي حد نفسه يتخلى عن عاده وحشه كان بيعملها
    وربنا هيقدره ان شاء الله

    وعلشان تقدرو تكملو رمضان زي ما انتو ناويين ان شاء الله حطي خطه من دلوقت بكل حاجه عاوزه تعمليها حطي كل حاجه ممكن تقربنا وتوصلنا ان شاء الله من العتق
    وحطي الخطه دي ف اوضتك ..علقيها تفضل قدامك وتراجعي كل يوم انتي عملتي ايه النهارده منها ..وقصرتي ف ايه تخلي بالك منه بكره

    وخلي حد معاكي يشجعك على الاستمرار ويفكرك ويشدك لو وقعت او رجعت خطو ه



    ويا رب مع بعض كده كلنا يجمعنا ف الجنه ونكون من عتاق السنه دي ويبلغنا رمضان ....
    امييييييييييييييييين
    بس زي ما قلتلكو ده مش هيكون لاي حد
    avatar
    brave_heart

    المساهمات : 146
    تاريخ التسجيل : 12/07/2009
    العمر : 21
    الموقع : قاعدة ع المنتدى

    رد: مين نفسه ان شاء الله ربنا يبلغه رمضان ؟؟

    مُساهمة  brave_heart في الثلاثاء أغسطس 25, 2009 5:43 am

    ميرسيه ليكى يا موون على الموضوع الجامد ده

    و شكلك تعبانة فيه
    و فعلا اكتر حاجة بتبقى واقعية ف رمضان هى ان الواحد بيأجل اى حاجة خير لوقت تانى
    وفى الغالب مبيعملهاش
    و الواحد فعلا خلاص اتعلم
    انه مدام قال هعملها بعدين تبقى خلاص مش هتتعمل
    ف ياريت كل واحدة فينا متأجلش حاجة لاى واقت
    و خير البر عاجل
    avatar
    عاشقة HAMSA TEAM

    المساهمات : 134
    تاريخ التسجيل : 12/07/2009
    العمر : 22
    الموقع : قدام الكمبيوتر

    رد: مين نفسه ان شاء الله ربنا يبلغه رمضان ؟؟

    مُساهمة  عاشقة HAMSA TEAM في الخميس أغسطس 27, 2009 4:59 am

    الله يا دودو يا حبيبتى
    تعرفى بجد ان الموضوع فعلا اثر فية
    واكتر حاجة عجبتنى فيه انك فعلا متكلمة من قلبك
    يعنى كل كلمة كتبتيها كنتى فعلا حساها وانا متاكدة من كدة
    نفسي كل البنات اللى فى العالم يقراوا الموضوع دة
    مش بس البنات كل الناس
    دة فى امهات هما اللى بيصحوا عيالهم يتفرجوا معاهم
    عشان ميقعدوش لوحدهم
    للاسف دى كارثة فى المجتمع
    وفعلا كلنا بنيجي العصر ونهنج
    بس لو استغلينا الوقت دة فى قراءة القران زى مل انتى بتقولى
    مش هنحس باى تعب
    والله مشكووووووووووووورة يا دودو عالموضوع دة
    ربنا يخليكي ويجزيكي خير
    avatar
    brave_heart

    المساهمات : 146
    تاريخ التسجيل : 12/07/2009
    العمر : 21
    الموقع : قاعدة ع المنتدى

    رد: مين نفسه ان شاء الله ربنا يبلغه رمضان ؟؟

    مُساهمة  brave_heart في الخميس أغسطس 27, 2009 8:10 am

    اى خدمة يا حاجة دودو...ادينى انا و ريحانة ردينا اهو

    ماتبقيش تبرجسى تانى بقى
    و تقعدى تشتمى ف المنتدى
    لانى بجد بمووت فيه
    المنتدى ده روحى
    بجد فيه
    avatar
    moon adorer

    المساهمات : 90
    تاريخ التسجيل : 15/08/2009
    العمر : 27

    رد: مين نفسه ان شاء الله ربنا يبلغه رمضان ؟؟

    مُساهمة  moon adorer في الخميس أغسطس 27, 2009 8:05 pm

    يبنتي انتي هبله ولا ايه انا والله مقدرش اشتم فيه بجد يا جماعه انا بحبكو جدا بس انا كنت زعلانه عشان محدش قال رأيه ولا عمل كومينت انا بس عاوزه اعرف هو حلو ولا وحش !!!!!!!!!!!!!!!!!!!!!!!!!!!!!!!!!1111
    avatar
    قلبى يتمنى الثبات
    Admin

    المساهمات : 210
    تاريخ التسجيل : 09/07/2009
    العمر : 22
    الموقع : فى بيتى

    رد: مين نفسه ان شاء الله ربنا يبلغه رمضان ؟؟

    مُساهمة  قلبى يتمنى الثبات في السبت أغسطس 29, 2009 1:45 pm

    مــــــا شـــــــــاء الـــلـــــه


    ربنا يحميكى ياحبى


    كل يوم بزداد اعجاب بيكى واخدك قدوه

    موضوع جمييل والله ربنا يعزك


    ربنا يثبتنا ياااارب
    avatar
    moon adorer

    المساهمات : 90
    تاريخ التسجيل : 15/08/2009
    العمر : 27

    رد: مين نفسه ان شاء الله ربنا يبلغه رمضان ؟؟

    مُساهمة  moon adorer في الإثنين أغسطس 31, 2009 9:59 pm

    ربنا يخليكي يا ناديه
    قدوه مره واحده ؟؟؟؟؟
    ربنا يستر........................

    مرسيه يا جكاعه ليكو كلكو
    وشكرا ع الردود اللي ترفع المعنويات دي

      الوقت/التاريخ الآن هو الأحد نوفمبر 19, 2017 6:57 am